25 November 2017|   शनिबार, मंसिर ९, २०७४

एक नाबालक सहित ८ सुरक्षाकर्मीको ज्यान मार्ने ज्यानमारा उम्मेखवार

          |   प्रकाशित मितिः आइतवार, कार्तिक १९, २०७४     9:24:05 AM  | 71 पटक पढिएको   |  

धनगढी – दुई वर्षअघि टीकापुरमा एक बालक सहित ८ जना सुरक्षाकर्मीको ज्यान जाने गरी भएको घटनाका फरार अभियुक्त रेशम चौधरीले कैलाली निर्वाचन क्षेत्र १ मा राजपाको तर्फबाट प्रतिनिधिसभा सदस्यमा उम्मेदवारी दर्ता गराएका छन् । उनले वारेस मार्फत उम्मेदवारी दर्ता गराएका हुन् ।

राज्यको नजरमा फरार रहेका व्यक्तिले उम्मेदवारी दर्ता गर्न गैरकानुनी भएको कानुन व्यवसायीको भनाइ छ । मुख्य निर्वाचन अधिकृत विष्णुप्रसाद अर्यालले कानुनी रूपमा नै फरार अभियुक्तको उम्मेदवारी दर्ता गराएको बताएका छन् । अदालतले मुद्दाको अन्तिम किनारा नलागेसम्म अभियुक्तलाई पनि उम्मेदवार बन्न पाउने कानुनी प्रवाधान भएको उनको भनाइ छ ।

रेशमविरुद्ध कसैको पनि उजुरी भने परेको छैन । नेपाल बार एसोसिएसन कैलालीका पूर्वअध्यक्ष गंगाप्रसाद पाध्यायले राज्यको नजरमा फरार अभियुक्तले उम्मेदवारी दर्ता गर्न नपाइने बताए । ‘फरार अभियुक्तले वारेस नै राख्न पाइँदैन,’ उनले भने ।

अर्का अधिवक्ता गम्भीर ऐरले कानुनमा वारेस दिन अयोग्य व्यक्तिले वारेसनामा दिन नपाइने स्पष्ट उल्लेख भएको बताए । ‘अयोग्य व्यक्तिले गैरकानुनी रुपमा वारेसनामा दिएका व्यक्तिले उम्मेदवारी दर्ता गर्न पाइँदैन । यो गैरकानुनी हो,’ उनले भने । मुख्य निर्वाचन अधिकृत अर्याल निर्वाचन लड्न पाउने भएपछि फरार व्यक्तिले वारेसनामा पनि राख्न पाइने बताएका छन् ।

टीकापुर घटनामा संलग्न भएको भन्दै रेशमविरुद्ध कर्तव्य ज्यान मुद्दा, ज्यान मार्ने उद्योग र हतियार डकैतीसम्बन्धी ३ वटा मुद्दा जिल्ला अदालत कैलालीमा परेको छ । त्यही मुद्दामा २५ जना २ वर्षदेखि पुर्पक्षका लागि थुनामा छन् भने घटनाका मुख्य योजनाकार भनिएका रेशम चौधरी २ वर्षदेखि फरार छन् । कैलालीका प्रमुख जिल्ला अधिकारी गोविन्द रिजालले फरार व्यक्तिले उम्मेदवारी दर्ता गर्ने कानुनबमोजिम भए–नभएको मुख्य निर्वाचन अधिकृतले हेर्ने विषय भएको बताएका छन् । ‘मुख्य निर्वाचन अधिकृतले हेर्ने भएकाले मैले यस विषयमा कुनै ध्यान दिएको छैन,’ उनले भने ।

यसैगरी टीकापुर घटनामा पुर्पक्षका लागि थुनामा रहेका लक्ष्मण थारूले कैलाली निर्वाचन क्षेत्र ६ मा राजपाबाट प्रतिनिधि सभामा उम्मेदवारी दर्ता गरेका छन् । उनले पनि वारेसमार्फत उम्मेदवारी दर्ता गराएका हुन् । उनको उम्मेदवारी स्थानीय जगन्नाथ चौधरीले दर्ता गरेका छन् । उनको उम्मेदवारी भने कानुनसम्मत भएको कानुन व्यवसायीले बताएका छन् । राज्यको नियन्त्रणमा रहेको र अदालतबाट अपराधी ठहर भइनसकेका व्यक्तिले कानुनी रुपमा उम्मेदवारी दर्ता गर्न पाउने अधिवक्ता ऐर बताउँछन् ।

तत्कालीन फोरम लोकतान्त्रिकका नेता थारु केही दिनअघि मात्र जेलबाटै राष्ट्रिय जनता पार्टीमा प्रवेश गरेका थिए । टीकापुरमा घटनाको मुख्य योजनाकार रहेको भन्दै थारुलार्ई पक्राउ गरिएको थियो । उनीमाथि दायर मुद्दा फैसला भएको छैन ।

-स्रोतः नागरिक न्युज दैनिक

Leave a comment

Your email address will not be published.


*